Lege i spesialisering - patologi

Ønskjer du ei framtidsretta spesialisering der teknologi, persontilpassa medisin og kreftdiagnostikk møtest?

Ved Avdeling for patologi i Helse Førde får du arbeide i eit fagfelt i rask utvikling. Patologi er sentralt i diagnostikk av kreft og andre sjukdommar, og moderne patologiarbeid kombinerer medisinsk kunnskap med avansert teknologi, digital patologi og molekylære analysar.

Vår avdeling består av omlag 25 medarbeidarar, organisert med fagområde histologi, cytologi, molekylær patologi og diagnostikk. Vi har eit tett samarbeid med det kliniske miljøet der patologar er sentrale bidragsytarar i utgreiing og behandling av våre pasientar. Vårt miljø er langt framme innan digital patologi, der det meste av gransking vert utført digitalt. Vi arbeider også aktivt med implementering av nye metodar for persontilpassa medisin innan molekylærpatologi. Avdelinga deltek i ulike nasjonale og regionale prosjekt knytta til patologi og persontilpassa medisin.

Hos oss blir du del av eit inkluderande fagmiljø med tett oppfølging frå erfarne overlegar og gode moglegheiter for fagleg utvikling. Vi tilbyr eit strukturert utdanningsløp med hovuddelen av spesialiseringa i Førde og tilleggsutdanning ved Haukeland universitetssjukehus. Arbeidstida er dagtid kl. 08.00-16.00, og ved behov kan fleksibel arbeidstid tilretteleggjast. Dette gir gode moglegheiter for balanse mellom jobb og fritid.

Førde sentralsjukehus er eit middels stort sjukehus med kliniske avdelingar for indremedisin, kirurgi, ortopedi, nevrologi, kreft, barn og ungdom, kvinneklinikk, øyre-nase-hals, intensiv og psykiatri.

Førde ligg sentralt i tidlegare Sogn og Fjordane, med god tilgang til flott vestlandsnatur. Her er gode moglegheiter for toppturar både sommar og vinter, og kort veg til kysten og båtliv. Førde er eit handelssentrum med eit rikt kulturtilbod som spenner frå kunst til konsertar. Les meir om livet i Sunnfjord kommune.

Vi ser etter deg som samarbeider godt med andre, er nysgjerrig, fagleg engasjert og ønskjer å bidra til presis diagnostikk og best mogleg behandling for pasientane.

• LIS får delta i diagnostisk arbeid innan patologi
• Makrobeskjæring og obduksjon
• Deltaking i dagleg drift av avdelinga
• Deltaking i undervisning, prosjekt og kvalitetsarbeid ved avdelinga 

• Norsk autorisasjon som lege
• Gjennomført LIS 1
• Erfaring frå patologi og relevant klinisk erfaring tel positivt
• Kunnskap og interesse for patologifaget er ein fordel
• Den som blir tilsett må kunne kommunisere godt på norsk eller skandinavisk munnleg og skriftleg 

• Gode samarbeidsevner 
• Vilje til å tileigne seg teoretisk og praktisk kunnskap 
• Evne til å arbeide ansvarleg, nøyaktig og effektivt 

• Personleg rettleiing og individuelt tilpassa utdanningsprogram 
• Rekrutteringstillegg 
• Triveleg arbeidsmiljø 
• Moglegheit for individuelt tilpassa arbeidstid 
• Løn i samsvar med gjeldande overeinskomst 
• Gode pensjons- og forsikringsordningar 
• Fagleg og personleg utvikling 

Vi oppfordrar alle søkjarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Om arbeidsgiveren:

Helse Førde HF har ansvar for spesialisthelsetenestene i Sogn og Fjordane. Føretaket arbeider for å gje pasientar og brukarar eit godt og heilskapeleg tilbod innanfor gjeldande rammer. Helse Førde sine institusjonar og prehospitale tenester er organisert i eit heilskapleg nettverk, og samarbeidet med andre instansar som m.a. kommunane er høgt prioritert. Føretaket har om lag 3 200 tilsette og eit budsjett på ca 4 milliardar kroner og er den største verksemda i Sogn og Fjordane. Forsking og innovasjon er og viktige oppgåver i sjukehuset. 

Helseføretaket er eigd av det statlege Helse Vest RHF. Føretaksgruppa i Helse Vest skal spegle mangfaldet i befolkninga i rekrutteringa vår. Vi oppmodar alle som er kvalifiserte til å søkje ledige stillingar uansett kjønn, alder,  fleirkulturell bakgrunn eller om du har hatt opphald frå arbeidslivet. Føretaksgruppa i Helse Vest ønskjer å leggje til rette for inkluderande rekruttering.